Iran: Ahmadinejad yashyize mu cyamunara imodoka ye ishaje ngo afashe imishinga y’ urubyiruko

Perezida wa Iran Mahmoud Ahmadinejad yashyize ku isoko imodoka ye yo mu bwoko bwa Peugeot 504 ikuze ngo abashe gutera inkunga imishinga y’ urubyiruko rwo mu gihugu ayoboye.

Nk’ uko Reuters yakomeje ibitangaza, ngo iyi modoka ni iyo yagendagamo akiri Umuyobozi w’ Umujyi wa Teheran mbere y’ uko aba Perezida muri 2005. Iyo modoka yagiye ayikoresha rimwe na rimwe mu bihe byashize mu rwego rwo kwiyoberanya, ngo atagenda mu bimodoka bihenze bakamumenya hanyuma umutekano we ukahahungabanira.

Iyo modoka yakozwe mu mwaka wa 1977, izegukanwa n’ umuntu uzatanga amafaranga menshi mu cyamunara izabera mu mujyi wa Abadan uherereye mu majyepfo y’ icyo gihugu. Ukuriye sosiyete igiye kugurisha iyo modoka M. Parhizkar yatangaje ko bafite ibyiringiro ko iyo modoka ishobora kuzarenza ikiguzi cy’ amadolari ibihumbi 2 ahwanye na miliyoni imwe na n’ ibihumbi magana abiri y’ U Rwanda, ari nacyo kiguzi cy’ iyo modoka muri Iran.

M. Parhizkar yatangaje ko amafaranga azavamo azahabwa ishyirahamwe Mehr ryishyurira ubukode urubyiruko rutishoboye. Amazu yo kubamo aracyari ikibazo muri icyo gihugu kuko 25% by’ abaturage miliyoni 75 ba Iran baba mu mazu y’ amakodeshanyo naho kimwe cya gatatu cy’ ibyo binjiza kigakoreshwa mu kwishyura inzu.