IMIRONGO YA INTERINETI 20 ISURWA KURUSHA IYINDI KU ISI N'ICYO ISHOBORA KUMARIRA ABANYARWANDA

Nubwo dukoresha rimwe na rimwe imirongo ya interineti mu buzima bwacu bwa buri munsi, hari igihe tuba tutazi ikibyihishe inyuma ndetse n'inyungu dushobora gukuramo. Iyo witegereje mu baherwe byibuze ijana ba mbere ku isi, harimo umunani baba barabigezeho bitewe nuko bicaye imbere ya za mudasobwa zabo bakazibyaza umusaruro mu bintu bitandukanye.

Aho twabaha ingero tubikesheje wikipedia:

1. Bill Gates (Microsoft): umuherwe wa mbere ku isi ubu!
2. Lawrence Ellison(Oracle corp.): Uwa kane ku isi.
3. Micheal Dell(Dell): uwa 25
4. Sergey Brin hamwe na mugenzi we Larry Page (Google): aba 26, akarusho bo bari munsi y'imyaka 40
5. Steven Ballmer (Microsoft): uwa 29
6. Paul Allen (Microsoft): uwa 32
7. Jeffrey Bezos (Amazon): uwa 68

Aba rero bakaba banadufatiye runini mu ikoreshwa ry'urubuga rwa interineti biturutse ku bicuruzwa byabo, mudasobwa, porogaramu (softwares cyangwa logiciels), n'ibindi...

Aha rero twibande ku bazamuwe n'urubuga rwa interineti aribo Sergey Brin, Larry Page ndetse na Jeffrey Bezos bari hejuru.

Aba bakaba bahagarariye abandi mu kubyaza umusaruro interineti kuko bo ubukungu bwabo babukesha ama website bubatse.

Ese ubundi websites cyangwa imirongo ya interineti yunguka gute?

Ubundi iyo wubaka website icyo uba ugamije ni ugukora ikintu kizakurura abantu bakaza kureba, kandi tuziko abashinzwe kumenyekanisha ibicuruzwa n'ibikorwa byabo (Chief marketing officers), bita ahantu hakunda guhurira cyangwa se kunyura abantu benshi. Aba rero bakururwa n'amawebsites kuko baba basa naho bari kwamamaza ku isi yose.

Ni muri urwo rwego rero Google yo yanashyizeho uburyo bwiza bwo kwamamaza kuko urebye ubundi Google ntiyamamaza kuri website yayo, ahubwo yamamaza ku z'abandi bakoresheje ibyo bita adsense biturute ku gitekerezo cya Paul Buchneit wigeze gukora muri Google, ibi rero bizanira amafaranga menshi yaba google ndetse no kuri ba nyiri website zisurwa cyane.

“Amazon.com” yo usibye kwamamaza iranagurisha bakayiha commission kubyagurishijwe ndetse n'indi bita “ebay”.

Dore urutonde rwa websites ziri imbere mu gusurwa n'abantu benshi twifashishije “Alexa”, iyi ikaba ari website ishinzwe kugenzura andi ma website imikorere yayo, uburyo asurwa, igihe abantu bayasura, igihe bamaraho n'ibindi bakoresheje ikoranabuhanga ryitwa “web crawling”.

Urutonde rero ni uru:

1. Google (google.com)
2. Facebook (facebook.com)
3. Yahoo (yahoo.com)
4. youtube(youtube.com)
5. Windows live( live.com)
6. Wikipedia (wikipedia.org)
7. Blogger.com ( Blogger.com)
8. Microsoft Network ( msn.com)
9. baidu (baidu.com)
10. Myspace (myspace.com)
11. Google India (google.co.in)
12. Twitter (twitter.com)
13. google (google.de)
14. QQ.com (qq.com)
15. Microsoft corporation (microsoft.com)
16. Rapidshare (rapidshare.com)
17. WordPress.com( wordpress.com)
18. Google (google.fr)
19. google (google.co.uk).

Aha ushobora kwibaza impamvu google igarukamo kenshi kandi ari imwe?

Google ntabwo igizwe na google.com gusa, urugero ubu website isurwa cyane mu rwanda ni google.rw, ahubwo Google iba ifite icyo bita “Domain names” nyinshi bityo zimwe muri zo zirasurwa cyane kandi ku isi yose, urundi rugero ni uko nko kuri “yahoo” domain name isurwa cyane kurusha izindi ni mail.yahoo.com.

Abanyarwanda na bo bashobora gutekereza bahereye kuri izi; imikorere yazo ndetse bakanakuraho ubumenyi bw'ibanze kugira ngo babashe na bo kubaka websites zishobora gusurwa kurusha izindi ndetse no gukora irindi koranabuhanga ritandukanye ryateza imbere u Rwanda kuko ibitekerezo byo bihora bivuka, nko kubaka Search engines websites (zifasha abantu gushakisha ibintu bitandukanye), Social Networks (zifasha abantu guhura), E-commerce websites (zifasha abantu mu bucuruzi), n'izindi.

Ikiza kibibamo iyo ubashije kubona abantu benshi bashoboka, ubona amafaranga menshi anyuze mu kwamamaza ndetse na adsense za Google, Adbrite za adbrite.com. Hhejuru y'ibyo bashobora no kuyigura, bitewe na tekinoloji cyangwa igitekerezo wakoresheje kandi ibi biba ku mafaranga menshi, urugero ni nk'iyi alexa.com yaguzwe na amazon.com kuri miliyoni 250 z'amadolari, friendfeed.com igurwa na facebook kuri miliyoni 46 z'amadolari, youtube.com igurwa na google kuri miliyari 1.65 z'amadolari.

Twarangiza tubibutsa ko ubu website yanyu www.igihe.com igeze ku mwanya wa 729.350 ku isi hose, kandi mu mezi make yari hejuru ya miliyoni 26, ibi tukaba tubikesha abanyarwanda kuko ari bo bonyine bayisura, mu minsi iza nitwongera imikorere tugashyira mu ndimi nk'icyongereza, bishobora kuzatuma twegera imbere ku buryo bugaragara.