Gushaka inzoka byatwaye akayabo k'amayero 100000

Mu gihugu cy'Ubudage umusore w'imyaka cumi n'icyenda ararira ayo kwarika kubera akayabo k'amayero agomba kwishyura mu gikorwa cyo gushakisha inzoka ye yari yamutorotse.

Ubwo iyi nzoka yatorokaga ikava aho ayororera hakurikiyeho akazi katoroshye ko kuyishakira kubura hasi no hejuru iki gikorwa kikaba cyarayobowe n'ubuyobozi bwite bwa Leta bwo muri ako gace uwo mudage atuyemo.

Nkuko bitangazwa na Zigonet, iyo nzoka ni iyo mu bwoko bwa Boa ikaba ireshya na santimetero 30.Impamvu yashakishijwe cyane kwari ukugirango idahungabanya umtekano w'abaturanyi.Iki gikorwa cyatwaye amayero 100.000 n'ubwo bwose iyo nzoka baje kuyibona mu nzu ya nyirayo yanapfuye.Aka kayabo k'amayero 100.000 yo gushakisha iyi nzoka uramutse ukavunje mu mafaranga y'u Rwanda akabakaba miliyoni 84.

Muri aka kayabo abaterankunga bamuhayemo 40.000 none nawe akaba agomba gutanga amayero 60.000 asigaye.Uyu musore w'imyaka 19 y'amavuko ararira ayo kwarika kuberako yabuze aho akura ako kayabo dore ko ngo muri iki gihe nta n'akazi afite. Iyi nzoka imubijije ibyuya yayiguze amayero 70. Abafite umutima utabara murarengere uyu mudage kugirango ashobore kwishyura naho ubundi biramuyobeye.