Kuri Goethe Institut ku Kacyiru habaye amahugurwa y’umuziki.

Kuri Goethe Institut ku Kacyiru, kuri uyu wa kabiri tariki 14 Nzeli habaye amahugurwa y’umuziki yarimo abanyamuziki benshi b'abanyarwanda bafatanyije n’aba-compositeur Volker Schlott na Falk Breitkreuz bavuye i Berlin mu gihugu cy’Ubudage.

Aya mahugurwa yatangiye mu masaha ya saa yine z’amanywa yarimo abanyamuziki biganjemo abanyarwanda bagera kuri cumi na batatu ari bo Mukanda Thomas, Rureshya Peter Reagan, Cubaka Justin, Kubwimana Janvier, Habimana Karim, Rukundo Jean Bosco, Slim Henry, Lil Emma, Bill Gates, Nzosabimana Richard, Nteziyaremye Livingstone, Amani Stallone na Ehret Michael bakaba bava mu ma-groupes ya Culture mix, Moriah, Sun light hip hop, UGV na Men on hills.

Mu gihe cy’amahugurwa, buri munyamuziki yatangaga injyana azi yifashishije igikoresho cy’umuziki amenyereye gukoresha, abandi bakayigenderaho bityo abalimu Volker na Falk bakaboneraho kubakosora bakurikije amanota y’iyo njyana, bakanabereka uburyo bwiza iyo njyana yakagenzemo ahanini bifashishije ibikoresho bakoresha, Volker akaba akoresha soprano saxophone naho Falk agakoresha bass clarinet.

Mu masaha ya saa kumi n’imwe z’umugoroba nibwo amahugurwa yarangiye hatangwa ibihembo ku bayitabiriye byari bigizwe na certificat yasinyweho n’aba balimu bombi ndetse n'umuyobozi wa Goethe Institut n’umupira wo kwambara.

Karin Kathöfer uyobora Goethe Institut, mu ijambo rye yashimiye abitabiriye aya mahugurwa, by’umwihariko ashimira aba balimu bavuye mu Budage. Goethe Institut yageneye Volker na Falk impano zirimo CD ya album ya SKC yitwa HAKI YAKO, iyi ikaba yarakozwe ku nkunga ya Goethe Institut.

Twaganiriye n’umwe mu bahuguwe Rureshya Peter Reagan, atubwira ko aya mahugurwa abasigiye byinshi nko kumenya aho bajyaga bakora amakosa igihe bacuranga, ku buryo mu bihe bizaza bashobora kuzagenda bikosora bityo bagakora umuziki wo mu rwego mpuzamahanga. Amahugurwa yasojwe n’ifoto y’urwibutso no gusangira.