Uganda: Mu gihe gito, Museveni arakura akayabo ka miriyoni 40 z’ amashiringi mu ndirimbo ye “Mpenkoni”

Mu gihe yayihimbaga agira ngo yireherezeho urubyiruko ruzabashe kumuhundagazaho amajwi mu matora ateganijwe mu mwaka utaha, Perezida wa Uganda Museveni ngo agiye kubona akayabo k’ amashiringi mu ndirimbo ye “Mpenkoni”.

Nk’ uko amakuru dukesha The Monitor yabitangaje, ngo abahanga mu gusesengura bagaragaje ko mu mezi atatu gusa abanza y’ umwaka wa 2011, Museveni azaba afite miriyoni zisaga 40 z’ amashiringi(40m Shr), ni amafaranga akoreshwa mu gihugu cya Uganda. Ako kayabo ngo azakishyurwa n’ amaradiyo akoresha iyo ndirimbo ndetse n’ amasosiyete y’ itumanaho kuko abafatabuguzi bazo iyo bayikoresha mu matelefoni.

Nk’ uko yabitangarije mu nama yamuhuje na Diaspora y’ Abagande kuri uyu wa Kane I Kampala muri Uganda, Umunyamabanga Mukuru w’ Ikigo gishinzwe kurengera abahanzi(UPRS) James Wasula, ngo Uwunganira Museveni mu mategeko yandikishije icyo gihangano mu kwezi gushize, bityo ngo Museveni yiteguye kuryamo akayabo bitarenze mu mpera z’ ukwezi kwa Werurwe umwaka wa 2011.